ازاي تسافر لوحدك!
ازاي بتسافري لوحدك؟ ، بتجيبي فلوس السفر منين ؟ ازاي بتنبسطي بالسفر لوحدك ؟ بتعملي ايه في مشكله اللغة ؟ وغيرها اسئلة كتير ناس بتسألها في موضوع السفر خاصة لو بنت ، خليني اجاوب على اهم الاسئلة دي
- بتجيبي فلوس السفر منين ؟
- كل سنة بعمل خطه سفر للسنة كها بحدد ايه الاماكن اللي هسافر لها وبحسب التكلفة وافضل اشتغل واحوش اواعمل جمعيات عشان اجيب تكاليف السفرية
- ازاي بتاخدي اجازات كتير من شغلك ؟
- مباخدش اجازات كتير ولا حاجة هي بتبقى سفرية طويلة في السنة اسبوع عشر ايام مثلا بسافرها وقت لما بيكون في اجازة طويلة اجازة عيد مثلا وازود عليها يومين تلاته من رصيد اجازاتي مع الويك اند ، او بسافر ويك اند مع يوم الاحد مثلا تلات ايام كل كام شهر في مدينة داخل مصر عشان افصل من كل حاجة بسافر الخميس بالليل وارجع فجر الاتنين على الشغل على طول :D
- بتعملي ايه في الفيزا؟
- كل بلد بيكون ليها اجراءات خاصه بيها يعني في دول مش بتحتاج فيزا زي ماليزيا، اندونسيا وغيرها، في دول تانية بتحتاج شوية اجراءات زي الشنجن مثلا ودي بتقدر تسافر بيها عدد دول بنفس الفيزا ودي بتحتاج شوية حاجات زي اخر تلات شهور من حسابك البنكي ويكون فيه رقم يغطي تكاليف الرحلة، خطاب من الشركه اللي بتشتغل فيها او السجل بتاع شركتك لو انت صاحب الشركة، حجز الاوتيل ، شهادة تحركات، حجز الطيران ذهاب وعوده... الخ وفي كمان دول بيتطلب للسفر ليها تصريح امني زي تركيا مثلا
بجهز كل الاوراق دي واحدد اليوم اللي هروح فيه السفارة او مكتب استلام الاوراق زي مثلا فرنسا، بلجيكا، المانيا بتروح مكتب TLS تقدم فيه الورق بس لازم تكون واخد ميعاد الاول وبعدها بقدم الورق واعرف هيترد علي امتى واتابع معاهم
- انزل في فندق ولا هوستل؟ ايه هو الهوستل ؟
- انا عادة بنزل في اوتيل تلات او اربع نجوم او هوستل يكون بنات بس والهوستل هو بيت شباب بيكون سعره ارخص كتير من الاوتيل وممكن تاخد فيه غرفة سنجل او مشتركه بنات بس او ولاد بس او ميكس بس بيبقى متواضع شوية عن الاوتيل يعني مش بتلاقي اللي يشيل ليك الشنطه مثلا ، مافيش وجبات او بتعمل الاكل بنفسك وهكذا
- ازاي بختار الفندق او الهوستل؟
- طبعا في مواقع كتير لحجز الفنادق والهوستيلز زي Booking, Hostelworld, وغيرهم كتير اوي اهم حاجة بدور عليها في الاوتيل او الهوستل وبعرفها من اراء الناس زي الامان، النضافة، قرب المكان لوسط البلد او محطه مترو او باص وبشوف كل تفاصيل الغرفة ، مش بيفرق معايا فيو، اكل ، حمام سباحة لان بالنسبة لي الاوتيل للنوم وبس، طبعا بختار حاجة
- Free Cancelation عشان اي ظروف وكمان بختار حاجة ما يكونش فيها دفع مقدم او اونلاين بدفع في الاوتيل تحسبا لاي حاجة ممكن تحصل تخليني الغي الرحلة زي ما حصل مع بداية الكورونا
- مش بتخافي لما بتسافري لوحدك ؟
- اه ببقى خايفة اكيد بس احساس المغامرة وانك هتعرف وتشوف حاجات جديدة بينسيك اي خوف وبعدين بعمل اللي علي وباخد كافة احتياطاتي وبتوكل على الله
- هل بتبقي مبسوطة وانت لوحدك؟
- اه جدا بستمتع وانا مسافرة لوحدي لأن ده بيديني مساحة اظبط وقتي بالشكل اللي يناسبني واظبط البرنامج بتاعي بس ده ما يمنعش السفر كمان مع جروب بيكون ممتع لانك بتكون مفضي دماغك من اي حاجة انت رايح تنبسط وبس وبتتعرف على ناس جديدة
- بتعملي ايه في مشكله اللغة خاصة لو بلد ما بتتعاملش بالانجلش اوي؟
- اللغة دي اخر حاجة ممكن تفكر فيها لأن الناس في اي بلد مش بتقيم لغتك الانجليزيه اذا كنت بتنطق صح ولا بتقول جرامر مظبوط ماية في الماية المهم انك توصل المعلومة صح وتفهم اللي قدامك ممكن بقى توصله بالانجليزي ، بالاشارة ، باستخدام صور من على جوجل هتلاقي طريقة تعرف توصل بيها المعلومة ما تقلقش ولو في اي حاجة مش مفهومة زي يافطة مثلا صور بالموبايل وجوجل هيترجملك ده ايه
- ايه انسب وقت للسفر؟
- ممكن تعمل بحث قبل ما تسافر عن افضل البلاد اللي ممكن تسافرها في الفترة دي زي مثلا افضل الوجهات للسفر في الربيع، الشتا، امتى اسافر (اسم البلد) او افضل اوقات للسفر الى ... وهكذا عشان تعرف تنبسط في السفرية
- لو عندي ترنزيت فترة طويلة اعمل ايه ؟
- لو معاك فيزا للبلد الترانزيت ممكن تدخل البلد وتعيش حياتك فيها لو الوقت مناسب بالنهار مثلا او تروح تبات في اوتيل في البلد دي لحد معاد طيارتك او تفضل في المطار وهنا قدامك حين يا تقعد على الكراسي مده الترانزيت وتقضيها شوبينج من ال
- Duty Free
او تروح لاونج مثلا وتستريح فيه ولو معاك حاجة زي ماستر كارد ممكن تدخلك لاونج ببلاش وتقضي فيه وقت الترانزيت او طبعا تنزل في اوتيل المطار وده لازم تكون ثري عربي :D
- نصايح عامة وقت السفر:
- اتأكد ان كل اوراقك معاك باسبورك، الحجوزات، مكان الاوتيل، الفيزا..... الخ
- روح قبل معاد الطيارة بوقت كافي ساعتين مثلا عشان ما تضمنش ايه اللي ممكن يحصل
- اتأكد من عدد ووزن الشنط المسموح بيه قبل ما تروح المطار عشان هتلبس وزن وتدفع او ترمي الحاجة فاتأكد من الرقم من التيكت بتاع الطيران
- اعمل Online Check in هيسهل عليك كتير وهتقدر تختار المكان اللي عايز تقعد فيه في الطيارة وكمان بتاخد البوردينج اونلاين فلو مش معاك شنط ووزن بتوفر عليك وقت وطوابير
- خلي معاك قلم عشان تملا البيانات قبل الجوازات عشان هتقف محتاس مش لاقي حد يسلفك قلم
- اوعى تاخد ازايز في سائل معاك في الشنطه اللي بتطلع بيها الطيارة زي البرفانات، الكريمات.... الخ، السكاكين، المقصات في قايمة ممنوعات هتلاقيها قدامك في كل حته حط اللي انت عايزة في الشنطه اللي بتتشحن في بطن الطيارة
.
.
-
تعليقات
إرسال تعليق