ازاي تسافر ببلاش!

 بتجيبو فلوس السفر منين؟ انتو أغنياء بقي عشان تسافرو كل ده؟

السوال ده اتكرر كتير علي فترات كتير عشان كده خليني اقولك ازاي تقدر تسافر كتير وبتكلفه اقل بكتير

سافر كذا بلد جنب بعض زي “سيريلانكا - ماليزيا - اندونسيا - فيتنام - تايلاندا - لاوس - كامبوديا - الفلبين “ او مثلا “ تركيا - جورجيا “ او كذا دوله في اوروبا لو رايح بلد شنجن، معظم الطيران للبلاد دي هتلاقيه من ١٥ يورو لغايه ٢٠ يورو يعني مش غالي غير لما تسافر من بلدك لبلد من دول علي طول هتلاقي التزكره مش اقل من ٣٥٠ يورو

دور في كذا مكان مش علي موقع واحد بس ودور علي كذا بلد يعني ممكن حضرتك تلاقي تيكت من مصر لليونان ترانزيت تركيا ب ٢٠٠٠ جنيه وفي نفس الوقت تيكت تركيا مباشر ب ٣ الاف حنيه تقوم وقتها حاجز اول واحده وتنزل تركيا بس لازم شنطتك تكون معاك ومش مشحونه وكمان لازم يكون معاك فيزا البلد التانيه اللي هي اليونان

احجز قبل الرحله ب ٣ اشهر علي الاقل لان هتلاقي الاسعار ارخص كل ما الفتره زادت ودايما جرب استخدم VPN لدول زي الهند او سيديلانكا عشان اوفات بتكون اسعارهم ارخص

اشتري تذكرتك قسط، حاليا مع العروض الكتير هتلاقي مواقع طيران بتقدم تقسيط للتذكره مع البنك بتاعك علي فتره من ٣ او ٦ او ٩ او ١٢ شهر بدون فوايد

انسي حاجه اسمها فندق، الفندق هو مكان تنام فيه مش اكتر ودايما خليك في هوستلز او Couchsurfing وبكده بفلوس الفندق هتقدر تزور اماكن اكتر وتستمتع اكتر

انسي حاجه اسمها تاكسي، احنا اتفقنا انت عايز تسافر باقل المصاريف عشان تستمتع اكتر وتسافر اكتر يبقي انسي التاكسي واركب زي الشعب اتوبيس او توكتوك او او

كل اكل البلد، في ناس بتسافر اصلا عشان تجرب الاكل المختلف في العالم كله واكل البلد او ال Local Food في العاده هتلاقيه غريب شويه بس تجربه جديده وممتعه

لو انت مسافر اسبوع مثلا للشغل اقعد اسبوعين واستغل الاسبوع التاني انك تتفسح

استغني عن الحاجات اللي مش اساسيه، مره كمان بقول اللي مش اساسيه يعني لو حضرتك بتروح ستاربكس كل يوم وبتصرف مثلا ١٠٠ جنيه في اليوم يعني في الشهر ٣ الاف جنيه وقللت من ذهابك هتلاقي نفسك في خلال ٣ او ٤ شهور حوشت مبلغ تسافر بيع، نفس الكلام لو بتشرب سجاير، انت لو بتشرب علبه في اليوم يعني بتصدف في الشهر ٤٢*٣٠=١٢٦٠ يعني في السنه ١٥ الف جنيه ودول ممكن يسفروك لاكتد من بلد، نفس الكلام لو بتجيب حاجات ملهاش لازمه انك تتنازل عنها مقابل انك هتسافر

استغل مهاراتك، بمعني لو انت عندك مهاره كويسه زي لغه او بتعرف جرافيك او او او، هتلاقي مواقع كتير تقدر تسجل نفسك عليها وتعمل شغل Freelance وهتلاقي دخلك زاد وبالزياده دي تقدر تسافر، ممكن تدرس انجليزي او اي لغه بتجيدها، المهم استغل مهاراتك

لما تسافر اوعي تحجز رحله من اول واحد تقابله، اسال، اسال، اسال،ويا سلام لو تعرف حد من البلد هتلاقيه بيقولك الاسعار الحقيقيه يعني مش هيتضحك عليك وتدفع سعر اعلي

اتطوع، لو وقتك يسمح ممكن تعمل شغل تطوع مقابل سكن ووجبات مجانيه، او تعمل اي شغل هناك زي في مزرعه وده مشهور جدا في استراليا وبتلاقي ناس من جنسيات كتير بيشتغلو الشغل ده عشان يجيبو دخل ويتفسحو اكتر، وكتير بلاد تقدر تدرس فيها انجليزي للاطفال وتاخد اجر علي ده

بلاش تشتري خط نت من المطار لان دايما هتلاقي نفسك دافع اضعاف تمنه واشتريه من اي مكان من السنتر لما توصل هتلاقيه ارخص بكتير وطبعا خلي كل مكالماتك من علي النت عشان متلاقيش نفسك دافع مبلغ في مكالمات دوليه

اسرق، لا ثواني مش هتسرق حد انت هتسرق برنامج رحلات الشركات لان معظم الوقت هما بيخلو كل حاجه جنب بعض عشان ميضيعوش وقت وامشي عليه، او اعمل المخطط بتاعك قبل ما تسافر ودايما اسال اهل البلد عن الاماكن اللي ممكن تروحها

استخدم الكروت عشان البونص، كل خطوط الطيران ليها برامج اميال ولما توصل لعدد معين ممكن تبدله برحله او ترقيه لدرجه الرحله، نفس الكلام البنوك في كروت بيكون عليها عروض علي كل جنيه تصرفه وتقدر تبدل النقاط بعد كده

سفرك مصدر فلوسك، ايوا سفرك مصدر فلوسك هقولك ازاي، كل اللي انت محتاجه انك تكتب، تصور، اعمل قناه يوتيوب، اعمل مداونه وكتب فيها عن رحلاتك ونصايح للمسافرين هتلاقي مع الوقت في ارباح جيالك من المشاهدات وفي نفس الوقت انت فيدت غيرك

اخرج من ال Comfort Zone انا هتكلم عن نفسي، من كام سنه انا سبت شغلي في شركه كبيره وغيرت مجالي خالص من مهندس وابتديت اخد دورات غوص لغايه ما بقيت مدرب غوص ومدير مركز غوص يعني بقيت My Own Boss عمرك ما هتبقي مبسوط لما تبقي شغال ٨ ولا ٩ ساعات في اليوم واكتد اجازه تاخدها هي اسبوع متواصل، دلواقتي انا مرتبي احسن بكتير من الشركه اللي كنت شغال فيها وبقدر اخد اجازه زي ما انا عايز وكمان اي دوله ممكن اسافرها ممكن اشتغل فيها Freelance في مجال الغوص وده اللي عملته في بلاد كتير منها سيريلانكا واندونسيا

كل ده انا مريت بيه ولو مشيت عليه هتلاقي نفسك بقيت عارف تسافر او بقيت بتسافر اكتر، واتمني اي حد عنده اضافه او تعديل يتفضل

تعديل: روحو أماكن مجنونه محدش راحها قبل كده، في اندونيسيا روحت بركان اسمه Bromo اللي في الصوره وهناك قالولي اني المصري الوحيد اللي قابلوه ونفس الكلام في بركان تاني اسمه Ejin ونفس الكلام لما عملت trekking في سوماترا، اعملو حاجات مجنونه وصدقوني هتتبسطو قوي

ودمتم مسافرين