الحياة... حق انتفاع!

 

حق إنتفاع ..

هي دي الدنيا متلخصة في كلمتين إنها بكل اللي فيها حق انتفاع ، مفيش حد يملك فيها أي حاجة ..

معاك ورق ملكية لكل حاجة عندك ، صح ؟ شقتك ، أرضك ، عربيتك ، حسابك في البنك ، و غيره و غيره ..

لكن تعالى نفكر : نفس الشقة اللي انت فيها من كام سنة كانت باسم والدك، و بعد كام سنة (ربنا يطول في عمرك ) ح تبقي باسم حد من ولادك ، صح .. يبقي انت كنت عايش فيها حق انتفاع و بس ، لغاية ما تخلص رسالتك و بعدين تسيبها للي بعدك زي ما سابهالك اللي قبلك ..

و الدنيا كلها بتلف كده على الكل .. الغريب إننا بنتخانق و نكره و يمكن نقتل بعض  على حاجات ربنا مسلفها لنا نقضي بيها كام يوم ، و بس..

مفيش ملكية حقيقية في الدنيا ، مجرد ملكية وهمية ..

زي غرفة الفندق تبقي بتاعتك يومين الإيجار ، و بعدين ترجع لأصحابها، أو كرسي الطيارة أو القطار أو التاكسي، يبقي بتاعك كام ساعة لغاية لما الرحلة تخلص و يجي اللي بعدك ياخده !!

لو فهمت كده ح تعمل حاجات كتير حلوة ..

ح تنبسط باللي عندك و تعمل بيه أكتر حاجات حلوة تفرح بيها مع كل حبايبك .. حَوِش ..صح ..بحكمة طبعاً لكن اوعي تقرطها على نفسك و على غيرك ..

كمان ح تبطل تتخانق و تضيع سلامك على حاجات تتحل بشوية تفاهم .. إخسر فلوس بس ما تخسرش راحة بالك ، و إوعي تضيع عمرك على حاجات هي في الاخر مش ملكك..

تالت حاجة ح تبسط اللي حواليك و تخليهم يفرحوا بوفرة عطاياك، و ح تفتكر ان كتير من اللي حوشناه يا رميناه، يا نسينا إنه عندنا ، يا تلف و عت و باظ من كتر الخزين.. كده ح تفرق و تكتر من خيرك علشان قلبك يعيش مرتاح ..

إفتكر إن الدنيا حق إنتفاع ، إستفيد منه و فيد بيه الناس على قد ما تقدر.